警告!

本人並沒有接受過任何正統神學訓練,所有發表內容,全屬個人信仰心得及教會生活經驗分享,敝blog負能量爆燈,如閱讀時感到不適,或出現任何不良反應,包括痰多咳嗽,夜睡不寧,神經緊張,潮熱汗出,心煩多疑,踎身起身見頭暈等徵狀,請即時停止,並向專業人士尋求協助。

2017年8月31日 星期四

不如唔好再講職場神學



去時代論壇考古,原來十幾年前曾經有一波關於職場神學嘅討論,但十幾年後,教會講嘅職場神學,依然係交白卷得個桔,甚至乎隱隱地被成功神學滲透。所謂職場見證,幾乎毫無例外地講當事人如何因為信耶穌(或者經信仰反省後)而取得事業上成功,或者本身係成功人士講自己職場經歷。譬如早排先讀完一篇見證,某某CEO說自己係信主前一星期工作七日,一日工作最少十二小時,信主後明白工作、金錢、地位不是一切,於是決定一星期只工作四日,準時收工陪家人,有時間到教會做義工,然後講工作唔人生嘅答案,耶穌先係。

相信大家打工仔聽完,會好似我咁講:「X,你係老闆咪得囉!」

工作唔人生嘅答案,我覺得失業都唔會係人生嘅答案囉。對於一個一日要返十二個鐘嘅保安,一個月遲到一次就比人扣五舊水勤工獎,如何實踐「工作唔係全部」、「一星期工作四天」?

近呢十年八年,又真係好少可,應該話從來無聽過有職場見證,係請個搵萬零二萬蚊嘅普通打工仔上台,講佢點受變態未婚中女上司搾壓,仔細老婆嫩又唔可以立亂辭職,逗雞碎咁多仲要比教會捽十一奉獻,唔係就話你偷取神嘅供物,即使係咁仍然保持對上帝有信心,對信仰不離不棄,認真追求。教會D職場講座,請親唔係管理層就係CEO,唔係專業人士律師會計師醫生就本身係老闆,近年仲開始請埋D傳銷撚上去講正向思考,教牧對職場的理解同分辨能力係咪低成咁?

結果,教會所推嘅職場神學,只適合社會少數中上層人士,佢地係職場上較有議價能力,有牙力同公司爭取,可以大致上滿足教會嘅要求,平衡到工作同生活,有時間星期日返教會,交十一奉獻又支持擴堂,又有時間參與事奉,甚至可以係工餘進修神學。例如我聽過有位神學院教授講道,當中佢講到某某基督徒做到公司的高層,係老闆的左右手,但老闆篤信民間宗教,搬公司時又拜神又燒衣又睇風水,佢堅持唔參與整個儀式企埋一二邊。喂阿哥,做到果個位咪得咯,係公司做清潔又阿芝阿佐,第二日就唔見人啦。早兩日先有單新聞,話兩個清潔阿姐係育嬰室換衫,比人投訴,如果係公司GM放工去跑步無地方換衫,鼠入去換衫,會唔會有人理個客投訴丫,唔會囉。

至於廣大打工仔,唔少基層更加係手停口停,飽受工作摧殘後,好唔容易先一星期返到一次教會,滿以為可以鬆一口氣之際,仲要比傳道人話你,返工要順服肉體的主人,好似服侍主一樣,窮到燶無飯開,仲要比人話無十一奉獻係偷取神的供物,要學寡婦兩個小錢,仍然要支持教會十億擴堂。

老老實實,不如教會唔好再搞咩職場神學喇,返完工剩底半條人命返到黎,仲要應酬你地班大帝,玩鳩me咩。傳道人唔好再講咩職場神學,講好篇道,講好聖經,等大家返到黎有一兩個鐘離開一下呢個咁痛苦嘅世界,滋養一下心靈。寧願個世界真係聖俗二分,教會同呢個世界係分開,我仲有個地方可以逃避一下,逃避可恥但有用嘛,總好過你地唔識扮識又要差隻腳入黎搞搞震教我點做,做唔到做唔出就係我唔順服唔屬靈要認罪悔改。

曾經呼籲過好多次,如果傳道人牧者有心理解下而家個所謂職場係點,有幾恐怖有幾壓迫,社會上有好多工作,只要你有心跳有呼吸就會請,例如洗碗、清潔、保安、倉務員等等,紆尊降貴腳踏實地咁打幾個月工,有返D第一手經驗,相信會更緊貼時代。科科。

5 則留言:

  1. 依家好多教會既職場神學可能係"職場成功神學", 又或"職場傳福音". 但係,真正既需要係在遇到唔同既職場環境,工作狀態,上司同事(如中年女魔頭)既時候,信徒可以點樣將聖經既教導行出來,點樣以基督徒既身份去面對及處理。我估,呢 D 先係教會要講既職場神學。 所以,唔係唔講,不過唔好錯重點。

    回覆刪除
    回覆
    1. 呢到有篇文
      有個好好的歸納
      https://freddykam.wordpress.com/2013/12/16/%E5%8F%8D%E6%80%9D%E8%81%B7%E5%A0%B4%E7%A5%9E%E5%AD%B8/

      當中講咗六種流行的職場神學,實際都無對準當今一般打工仔係工作上面對到嘅問題。

      刪除
  2. 真是荒謬,把自己看得那麼高。職場神學係比嗰啲成為左/有機會成為大老闆的人架嘛,你估個個都係摩西約瑟但以理咩? 日日為磚頭打拼的,就唔好諗咁多,而家連稻草都拎走埋你呀。

    #曲線要講明(好似係)

    回覆刪除
  3. 教會的確係堅離地。

    回覆刪除
    回覆
    1. 我有時甚至不介意教會離地,教會離地才能助人超渡塵世間的痛苦,教會嘗試貼地,反而苦害信徒。

      刪除