警告!

本人並沒有接受過任何正統神學訓練,所有發表內容,全屬個人信仰心得及教會生活經驗分享,敝blog負能量爆燈,如閱讀時感到不適,或出現任何不良反應,包括痰多咳嗽,夜睡不寧,神經緊張,潮熱汗出,心煩多疑,踎身起身見頭暈等徵狀,請即時停止,並向專業人士尋求協助。

2017年7月10日 星期一

柒到裂開



是咁的。

原來一直唔知道,Blogger.com係有垃圾留言呢個功能,亦唔知以乜準則去判斷。但由於從來無click過入去睇,由我開Blog以來,好多留言掉咗入去無顯示出黎,並唔係因為我刪留言。由於事過境遷,唔想一一回應,是但抽幾個留言講下。

而家我一次過睇返晒,通常留言分成兩類,一方面當然係覺得我寫中咗好有共鳴,仰天長嘆一聲「吾道不孤」,另一類當然係黎挑機,就好似以下呢位Philip咁。

其實自問係一位負能量爆燈的人,對住呢D批評,都真係自愧不如,唔知呢位Philip係咪信徒呢?就算係非信徒,因為意見唔同,都唔駛咒人去死掛。覺得我篇文寫錯D乜,咪逐點反駁囉,我又唔會唔比你駁。Philip弟兄,你知唔知咩叫評論呀?呢種論調到一個點真係駁都唔想再駁。如果咁講法係啱,何止我,世界上所有食評、政論、運動評述員都要死啦,寫食評條友難道煮野食要勁過米芝連三星大廚先可以寫,要自己開間餐廳拎三星先寫得?世界上有邊個足球評述員而家落場勁得過C朗、美斯?有邊個寫社評的人,自己創立過一個國家,一個政府,一個烏托邦?

呀Philip弟兄,你自己有無寫過blog呀,寫成點架,甚至有無寫開文,放上黎比大家參詳下,你一野彈到我咁勁,甚至叫我早奔天國路,我好想見識你手文寫得有幾好。

所以以下係我的回應:

我認為你應該立即離開呢個blog,自己開返一個天下無敵,天衣無縫,人見人愛,車見車載嘅blog,祝你早日實現。如果開唔到,我宅心仁厚,係唔會咒你去死。

另一種,經常聽到的係,「建設很難,但拆毀很易」。老老豆豆,呢幾年係教會的體會,又真係剛剛相反,係建設好易,但拆毀好難。譬如咁講,近年的確好多人出黎鬧教會,有無邊間堂會比人鬧到執笠;有無邊個傳道人比人鬧到要收山;有無堂會比人鬧下鬧下,真係會煞o停自己的擴堂「異象」;有無邊個宗派,比人鬧下鬧下會有信徒大規模出走;我真係一間都搵唔到囉,主愛臨香江咪一樣照搞,成日話我地拆毀好易,咁我地實際上拆毀過D乜呢。又我反對自己教會買老人院擴堂,咪又係眨下眼批咗幾千萬出去,阻都阻唔到。

區區一個馬斯特係成個香港基督教界好渺少架咋,何止雞蛋對高牆,簡直係蝦子對長城。

順手回Angela Kwong一下,我唔係返埔浸架,如果你覺得有人同我相似,係因為不同教會之間的問題太過類似。

MY Leung,我覆咗你,請check mail。

沒有留言:

張貼留言