警告!

本人並沒有接受過任何正統神學訓練,所有發表內容,全屬個人信仰心得及教會生活經驗分享,敝blog負能量爆燈,如閱讀時感到不適,或出現任何不良反應,包括痰多咳嗽,夜睡不寧,神經緊張,潮熱汗出,心煩多疑,踎身起身見頭暈等徵狀,請即時停止,並向專業人士尋求協助。

2015年6月24日 星期三

虛偽信徒製造所 (教會單身事工系列三十二)


上一回講到,果套so called基督徒戀愛觀,有可能追溯到上世紀五十年代,唔講咁遠,最起碼我係九十年代初返教會時,都係接受呢套教導,到今時今日都超過二十幾年。咁係呢二十幾年,世界經歷過D咩變化呢?樓市由九七爆煲後再經歷03沙士08金融海嘯,而家都升穿97年水平,由無互聯網到有互聯網,到而家唔可以無互聯網,奧巴馬選到總統加冧莊到就黎卸任,劉翔由拎奧運冠軍到係比賽場上仆街到因傷退役,股市由三萬點跌落去到就黎升返上三萬點,大時代重播完又重播。


即使我認同呢套野係由聖經而黎,教會都無乜可能唔去因應時代變化而作出回應。即使我認同呢套野係由聖經而黎,甚至教會唔駛理社會有乜變化,都唔可能十五六歲又係咁教,對住三十五六歲又係咁教,一成不變。

例如,八二年套《烈火青春》,有一幕就係湯鎮業個細佬,同人地個女搞左野,湯鎮業比人捉出黎講數,要佢細佬娶人個女。八十年代好多人仲流行緊呢種觀念,搞野=結婚,同人上完床就要負責任娶佢返黎,到而家2015年,生埋仔都未必一定要結婚。我唔係話呢d價值觀係啱,但社會風氣的確係轉變左。

教會係提供呢方面教導之上,不單止處於劣勢,係連自己處於劣勢都唔知。

例如,我又真係從未見過教會呢D戀愛講座,會貼身到講女朋友PMS時,男朋友應該點照顧佢;女朋友發現男朋友上咸網打丁丁時,應該點面對。大家不妨上高登/she.com/yahoo知識+/Baby kingdom一轉睇下有幾多人問呢D問題,教會係一般男女相處上,仲講緊唔好去偏辟地方拍拖,對方單獨係屋企時就唔好上去探佢,接吻只可以錫額頭,脫節得好緊要。

最簡單咁講,係男女比例失衡嘅情況下,姊妹想拍拖結婚,係避免唔到要考慮非信徒,咁果套戀愛觀入面,有無任何篇幅去講點處理?我相信就算要揀一個非信徒去拍拖,當中都有好壞之分。教會既然咁鍾意事無大小都去管理信徒生命,點解又唔整多套《信與不信戀愛十誡》比佢地有所指引。

當真係要同一個非基拍拖時,有乜野係需要留意,點面對同一個唔信嘅人拍拖果種張力,點樣同佢傳福音,點樣處理同教會之間嘅磨擦?即使教會又係我唔知我唔聽我唔理,咁退一步,係男女比例懸殊之下,係咪應該研究點樣牧養一班被恩賜嘅姊妹。

教會經常強調基督徒要有一套唔同嘅價值觀,要分別為聖,特別係戀愛婚姻上面,所以自細就會教,甚至係逼大家去接受,耐唔耐仲聽到D青少年團契導師棒打鴛鴦,認為邊個同邊個唔係咁適合係埋一齊,或者係學業為重(eg.永光堂就規定上大學前不準拍拖),就勸,甚至係逼佢地分手,或者美其名叫佢地分開一年半載,睇下上帝仲有無保守呢段關係,實際係就係對付窩蛋牛肉飯上面隻蛋咁,要搞散佢。

但花咁多心機同時間之後,呢一套所謂基督徒愛情婚姻觀,有無真正反映係大家行為或者思想上呢?就算連教果個相信都無十足信心呢套係work,好似之前果篇《戀愛十誡》,傳道人連proofread都無就出街,大家覺得佢地有幾咁重視呢?只不過以前咁教落,而家又要咁教,唔敢改變唔敢因應時代變化而更新,聽果D自覺唔掂又唔會出聲,以免係教會受人針對。大家面對呢D事,都係面一套,底一套,見人講人話,見神講神話,返到教會就講教會果套,出到去就用出面果套。 

教會唔能夠面對現實,努力反省更新,只會不斷培養出一代又一代虛偽信徒。

4 則留言:

  1. 男女相處上, 好諷刺地有時會係由一個發過市的人以他們的"專業知識"去指導你, 跟住一齊理所當然地單身, 好hyper 地服事主, 就算有異身埋身, 都要喂同你一齊都唔可以影響我服事喎, 如果你同神之間, 我會選上帝 , 跳起 yeah !

    回覆刪除
  2. 男女相處上, 好諷刺地有時會係由一個發過市的人以他們的"專業知識"去指導你, 跟住一齊理所當然地單身, 好hyper 地服事主, 就算有異身埋身, 都要喂同你一齊都唔可以影響我服事喎, 如果你同神之間, 我會選上帝 , 跳起 yeah !

    回覆刪除
  3. 已婚教牧同工理應關心單身姊妹婚姻問題.盡吓力.

    利申:我是一個已婚資深的老翁平信徒.

    回覆刪除